Eskerrik asko gure produktuak seguru mantentzen laguntzeagatik. Dokumentu honek azaltzen du nola jakinaraz diezagukezun KIDE, S. Coop.-en (aurrerantzean, KIDE) produktu batean aurkitu duzun segurtasun-ahultasun bat, eta zer espero dezakezun gugandik une horretatik aurrera.
Gure konpromisoa
KIDEk segurtasun-komunitatearen, bezeroen eta ikertzaile independenteen lankidetza baloratzen du gure produktuetako ahultasunak identifikatzeko eta zuzentzeko. Politika honen arabera jasotako jakinarazpen guztiak fede onez artatzeko konpromisoa hartzen dugu, ahultasun bat arduraz eta hemen deskribatutako baldintzak errespetatuz jakinarazten duenaren aurka legezko neurririk hartu gabe.
Aplikazio-eremua
Politika hau KIDEk garatu eta merkaturatutako elementu digitalak dituzten produktu konektatuei aplikatzen zaie, baita horiei lotutako software- eta firmware-osagaiei ere.
Politika honetatik kanpo geratzen dira KIDEk kudeatzen ez dituen hirugarrenen sistemak, gure langileen edo bezeroen aurkako ingeniaritza sozialeko erasoak eta gure bezeroen ekoizpeneko instalazioen erabilgarritasuna kaltetu dezaketen probak (adibidez, zerbitzu-ukapeneko erasoak). Aurkikuntza bat aplikazio-eremuaren barruan dagoen zalantzarik baduzu, jakinarazi hala ere: ebaluatu egingo dugu.
Nola jakinarazi ahultasun bat
Ahultasun bat kanal honen bidez jakinaraz diezagukezu:
- Web-inprimakia: www.kide.com webguneko «Segurtasuna» atalean dago eskuragarri, aurkikuntza deskribatzeko behar diren eremuekin.
Ahal den neurrian, honako hauek sartzeko eskatzen dizugu: eragindako produktua eta bertsioa; arazoaren deskribapena eta hura nola ustia daitekeen; arazoa erreproduzitzeko urratsak; eta, baldin badituzu, pantaila-argazkiak, erregistroak edo kontzeptu-frogaren kodea (proof of concept).
Jakinarazpena modu anonimoan egin dezakezu. Kontuan izan xehetasunak argitzeko edo dibulgazioa koordinatzeko zurekin harremanetan jarri behar badugu, ezingo dugula egin harremanetarako biderik uzten ez baduzu.
Zer espero dezakezu gugandik
| Mugarria | Gure konpromisoa |
|---|---|
| Jaso izanaren baieztapena | Zure jakinarazpena jaso eta gehienez 3 laneguneko epean, jaso dugula baieztatuko dizugu eta jarraipena egiteko identifikatzaile bat esleituko dizugu. |
| Hasierako ebaluazioa | Gehienez 10 laneguneko epean, ahultasuna baieztatu ahal izan dugun eta zer lehentasun esleitu diogun jakinaraziko dizugu. |
| Jarraipen-eguneraketak | Zuzenketan lanean ari garen bitartean, aurrerapenen berri emango dizugu aldizka, gutxienez 30 egunean behin kasuak irekita jarraitzen badu. |
| Konponbidea eta dibulgazioa | Zuzenketa eskuragarri dagoenean, segurtasun-ohar bat argitaratuko dugu eta horren berri emango dizugu, adostutako aitortzarekin batera. |
Enbargo-politika (dibulgazio koordinatua)
Ahultasunaren xehetasunak publikoki ez zabaltzeko eta hirugarrenekin ez partekatzeko eskatzen dizugu, zuzenketa edo arintze-neurri bat argitaratu arte, edo zure hasierako jakinarazpenetik 90 egun natural igaro arte, lehenago gertatzen dena kontuan hartuta. Epe hori laburtu edo luzatu ahal izango da KIDEren eta jakinarazpena egin duen pertsonaren arteko adostasunez, zuzenketaren konplexutasuna eta ahultasuna aktiboki ustiatzen ari den kontuan hartuta.
Ahultasuna aktiboki ustiatzen ari bada edo gure bezeroentzat arrisku larria eta berehalakoa badakar, KIDEk ohar baten eta dagozkion arintze-neurrien argitalpena aurreratu ahal izango du, behin betiko zuzenketa eskuragarri izan aurretik ere.
Segurtasun-oharraren argitalpena
Zuzenketa eskuragarri dagoenean, segurtasun-ohar bat argitaratuko dugu gure webguneko «Segurtasun-oharrak» atalean. Bertan, ahultasuna, eragindako produktua eta bertsioak, larritasuna eta zuzenketa edo arintze-neurria aplikatzeko jarraibideak azalduko ditugu.
Aitortza
Nahi baduzu, zure izena edo ezizena sartuko dugu argitaratutako segurtasun-oharrean, zure ekarpena eskertzeko. Anonimotasuna mantendu nahi baduzu, zure erabakia errespetatuko dugu.
KIDEk ez du sari ekonomikoen programarik. Aitortza ahultasunaren jakinarazpenean eskerrak publikoki ematera mugatzen da, bertan aipatua izan nahi baduzu.
Harremanetarako
Politika honekin lotutako edozein kontsulta egiteko, helbide honetara idatz diezagukezu: security@kide.com.
Azken eguneraketa: 2026/09/16
